Historia om Jeanne d'Arc har engasjert og fascinert gjennom århundra. Livet hennar var like dramatisk som det var kort. Bondejenta blei berre 19 år, men rakk å leie soldatar i krig, krone ein konge og tenne eit håp som skulle bli vendepunktet i Frankrikes hundre år lange krig mot England.

I dag, nesten 600 år seinare, slåst vidt forskjellige grupper om eigarskap til Jeanne. Katolikkar, feministar, nasjonalistar – alle vil ha henne som sin frontfigur. Kven var Jeanne d'Arc, og kor kom motet hennar frå? Kva er det med lagnaden hennar som framleis rører oss – lenge etter at ho blei brent på bålet, og gjort til helgen?

- Eg er interessert i mennesket Jeanne d'Arc. Ei så ung kvinne på 1400-talet som klarer det utrulegaste. Kva driv ei ung jente til å få til alt dette? Ho sto opp mot makthavarane, og det vitnar om ein person med høg integritet og stor drivkraft. Det er dei menneskelege aspekta eg er interessert i, seier regissør Eline Arbo.

Anbefalt aldergrense 15 år.

Gratis intro! Før kvar framsyning på turné blir det eit introduksjonsforedrag i regi av Nobels Fredssenter med tittel «Kva er vi villige til å kjempe for i dag?» Fredssenteret er invitert med på turné i kraft av å vere forvaltar av nokre av vår tids viktigaste historier om menneske som kjempar for noko større enn seg sjølv. Les meir