Mii lea Riikateáhter

Riikateáhter vuođđuduvvui lága bokte nubbi máilmmisoađi maŋŋá, Norgga riikka kultuvrralaš ođđasithuksema oassin:

OLLES NORGGAS

Min geahččit leat buohkat, geat ásset Norggas. Mii čájehit teáhtera báikkiin maid gaskkas lea nu guhkki ahte livččet sáhttit leat vaikko Eurohpa goabbat geažis.
Dát mielddisbuktá ahte fertet muitalit historjjáid mat sáhttet min ovttastahttit, mat sáhttet buhttet daid máŋgga uhcit ja stuorát báikkálaš iešvuođaid maiguin mii eallit dáppe min riikkas – dakkár muitalusat main mii buohkat sáhttit dovdat gullevašvuođa, gos ihkinassii mii orrut ge.  

Jus mii galgat buohkaid olahit, de dávjjimusat eat báze eanet go ovtta beaivvi juohke háve go fitnat. Čuovvovaš eahket leat mii juo joavdán ođđa báikái. Lea danin nu dehálaš ahte mii dalle fállat buot buoremusa.  Geahččit galget sáhttit luohttit dasa, ahte go Riikateáhter boahtá, dalle mii fállat alimus dási teáhtera ja lávdedáidaga. 

RIIKATEÁHTERA STRATEGIIJA 2025-2030

Min višuvdna: Riikateáhter buorida eallima. Vaikko gii don leaččat ge, vaikko mii dus lea, ja vaikko gos don orut, de Riikateáhter buorida eallima miehtá riikka. 

Min miššuvdna: Mii háliidat leat teáhter mii lea olahanmuttus, mii guoskkaha ja riggodahttá. Dán dahkat go ráhkadit ja ovdanbuktit girjás lávdedáiddafálaldaga miehtá riikka. 

Mii ovdánahttit lávdedáidaga, ja mii vuolidit šielmmá teáhterii. Dán láhkai šaddá teáhter olbmuidgaskasaš, kultuvrraid gaskasaš ja geahččanbáikkiid gaskasaš šaldin. 

Min vuoruheamit:

• Riikateáhter galgá ráhkadit lávdedáidaga mii lea áigeguovdil ja mii duođas lea dehálaš.
• Riikateáhter galgá váldit stuorra servodatovddasvástádusa.
• Riikateáhter galgá bargat gehččiidjoavkkuid lassáneami várás.
• Riikateáhter galgá vuoruhit mánáid ja nuoraid.

ÁLGGII FINNMÁRKKUS

Vuosttamuš Riikateáhterčájálmasmátki lei «En reise i natten» (Mátkkošteapmi ihkku) Sigurd Christiansen bokte.

Čájálmasmátki álggii Finnmárkkus suoidnemánu 19.b. 1949, fylkkas mii lei dovdan soađi bániid erenoamážit garrasit. Riikateáhter vuosttamuš hoavda, Frits von der Lippe, anii «Riikateáhter – olles riikka teáhter» iežas barggu bajilčállagiin.

NORGGA NAŠUNÁLA ČÁJÁLMASTEÁHTER

Riikateáhter čájeha dál bihtáid 75 kulturviesuin miehtá riikka. Ovtta jagi siste sáddet gaskal 8 ja 10 čájálmasa miehtá riikka gehččiide. 

Riikateáhtera čájálmasat leat stuorra, divrras buvttadeamit mat čájehuvvojit stuorrá formáhtas eahkedis daid iešguđegelágan kulturviesuin.  

Go čájálmasjoavku joavdá ođđa čájálmasbáikái, de guddojuvvojit buot teknihkalaš reaiddut busses kulturvissui. Moadde tiimmu siste leat Riikateáhtera teknihkkárat huksen sihke lávdedekorašuvnnaid ja čuovga- ja jietnateknihka. Sii leat heŋgen ja ordnen buot lávdebiktasiid gárvvisin eahkedii, ja sii leat oahpásmahttán iežaset báikkálaš dilálašvuođain, sihkkarastin dihte ahte geahččit besset čájálmasa vásihit buot buoremus láhkai. 

Mii čájehit oktii juohke báikkis – guhtta beaivvi vahkus. Oktiibuot vuodjá Riikateáhter eanet go  130 000 km jahkái bussiin, ja mis leat eanet go 8000 hoteallaidjadeami jagis. Mis sáhttet leat gitta 5-6 iešguđetge čájálmasa mátkkis oktanaga. 

Riikateáhter lea etáhta mii gullá Kulturdepartemeantta vuollái. Wenche Viktorsdatter Paulsen lea Riikateáhtera hoavda. Son válddii badjelasas ámmáha cuoŋománu 1.b.2025 Arne Nøst maŋŋá, gii dalle lei jođihan teáhtera vihtta jagi. 

MAID MII ČÁJEHIT?

Mii čájehit sihke stuorra klassihkkáriid ja ođđa dálááiggedramatihka. 
Riikateáhter deattuha erenoamážit mánáid- ja bearašteáhtera. Min áigumuš lea fállat lávdedáidaga maid min geahččit miehtá Norgga dovdat áigeguovdilin, movttiidahttin ja geasuheaddjin 

Mis lea lagas ovttasbargu sihke kulturviesuin ja muđui teáhter-Norggain, ja mii gaskkustit sihke iežamet bihtáid, ovttasbargobuvttademiid ja bihtáid maid leat oastán eará teáhteriin.

NEAVTTÁRAT

Riikateáhter lea prošeaktateáhter. Mis eai leat fásta neavttárat, mii baicce barggahit luođubargi neavttáriid ja eará teáhteriid neavttáriid. Oassi min servodatbarggus lea fállat ođđa taleanttaide vejolašvuođaid. Danin mii dávjá lágidit geahččalemiid, maid bokte gávdnat neavttáriid boahttevaš čájálmasaide. 

VÁSIT EAMBBO

Riikateáhter fállá eambbo go lávdečájálmasaid. Mii fállat maiddái háleštemiid neavttáriiguin, bargobájiid neavttáriiguin, introduserenlogaldallamiid teáhterfeaskáris dahje eará liigedoaimmaid. Vásit eambbo - doaimmat galget lasihit vásáhussii, buoridit dovdama ja duddjot lagat oktavuođa neavttáriid ja gehččiid gaskkas.

FÁLALDAT SKUVLLAIDE

Riikateáhteris lea bileahttafoanda mas mánáid-, nuoraid-, joatká- ja álbmotallaskuvlla oahpaheaddjit sáhttet ohcat friddjabileahtaid. Muhtun čájálmasaide fállá Riikateáhter heivehuvvon lágideami skuvlaluohkáid várás. Skuvlalágideamit leat dávjá heivehuvvon iešguđetge fágaid ektui – sáhttet leat omd. ráhkkananbarggut ovdal čájálmasa, dahje čiekŋudahttinbarggut čájálmasa maŋŋá. Mii fállat maiddái neavttárdeaivvadeami jus skuvllat nu háliidit. Muhtun čájálmasat čájehuvvojit maiddái kulturviesuin beaivet – lea dalle nuvttá skuvlaluohkáide. Loga eanet min skuvlafálaldagaid birra.

MII GEAVVÁ NYDALENIS?

Riikateáhter lea máŋggabealat ásahus mii ferte vastidit stuorra gáibádusaide logistihka ja plánema hárrái. Buvttadeapmi, hálddašeapmi ja lávdái ceggema dáhpáhuvvet Nydalenis Osloves. Doppe lágida teáhter maiddái geahččalančájálmasaid ovdal go čájálmasmátki álgá. 

Lassin teáhtera fásta bargit, geat barget 27 iešguđegelágan fágajoavkkuin, de barggaha Riikateáhter birrasii 200 neavttára, bagadalli, teknihkkára ja eará lávdedáiddabargi jahkásaččat. Dáinna leat mii Norgga stuorimus luođubargiid bargoaddiid gaskkas. 

Riikateáhter bargobadji Brobekkas Osloves juohkit mii Nationaltheatret:in.

RIIKAORRUN

Jus leat luođubargi dahje barggat lávdedáidagiin, de fállat dál dutnje ohcan láhkai kantorsaji dahje lávdelanja vissis áigodahkii. Loga eanet RiikaOrrumis dás.