Mikä oon Riksteatret

Riksteatret perustethiin lain myötä toisen mailmansoan jälkhiin, osana Norjan kulttuurin jäälleenrakentamista:

KOKO NORJA

Meän pyblikymi oon kaikki Norjassa asuvat. Met esitämmä teatteria paikkoissa, jokka oon niin kaukana toisisthaan, ette net oltais yhtä hyvin voinu sijaita vastakkaisissa päissä Eurooppaa. Se merkittee, ette met hääymä jakkaat muisteluksia, jokka voivat yhistää meät yli niitten monitten pienitten ja suuritten eroitten, joitten kans met elämä tässä maassa  – muisteluksia, joihin met kaikki voima tuntea omistusta, huolimatta siitä, missä met asuma.

Jos haluamma tavoittaa kaikki, yhele vierailulle ei jää ylheensä ko yksi päivä. Seuraavanna iltana olema jo uuela paikkakunnala. Siitä syystä se oon vielä tärkeämpää, ette tarjoamma parasta kvaliteetia. Kattojat saatavat luottaa siihen, ette ko Riksteatret tullee, het saavat parasta teatteria ja seenikynstiä.

RIKSTEATRETIN STRATEGIA 2025-2030

Meän visuuni: Riksteatret anttaa elämälle tarkoitusta. Huolimatta kuka sie olet, mitä sulla oon ja missä sie asut, Riksteatret tekkee hyvän elämästä koko maassa.

Meän misuuni: Meän misuuni oon olla teatteri, joka oon saatavilla ja joka koskettaa ja rikastuttaa. Tämän met tehemä luomala ja välittämälä varieerattua seenikynstitarjousta koko maale.

Met kehitämmä seenikynstiallaa ja laskema kynnystä tulla teatterhiin. Sillä laila teatterista tullee sillanrakentaja ihmisten, kulttuuritten ja perspektiivitten välile. 

Meän prioriteeringit:

• Riksteatret häätyy tehä seenikynstiä, joka oon tarphelista ja joka toela merkittee jotaki.
• Riksteatret häätyy ottaat suuren vasthuun samfynnistä.
• Riksteatret häätyy työtelä teatteripyblikymin laajenemisen puolesta.
• Riksteatret häätyy prioriteerata lapsia ja nuoria.

ALKU FINMARKUSSA

Kaikkiin ensimäinen Riksteatretin reisu oli Sigurd Christiansenin "En reise i natten". Reisu lähti  16. heinäkuuta 1949 Finmarkusta, joka oli fylkki, johon soanteot oli vaikuttannu erityisen kovasti. Riksteatretin ensimäiselä johtajalla Frits von der Lippelä oli mottona "Riksteatret -koko maan teatteri".

NORJAN KANSALINEN REISUTEATTERI

Riksteatret pellaa tääpänä 75 kulttuurihuonheessa koko maassa. Vuuen aikana met lähetämmä kaheksesta kymmenheen teatteriproduksuunia reishuun ja meilä oon noin 400 esitystä pyblikymile ympäri koko maata.

Riksteatretin esitykset oon isoja ja hintavia produksuunia, jokka esitethään kokoformaatissa kulttuurihuonheissa ilta-aikhaan. Ko reisuroikka tullee uutheen pelipaikkhaan, kannethaan kaikki tekniset kampheet reisubussista sisäle kulttuurihuonheesseen.

Jonkun tiiman aikana oon Riksteatretin tekninen tiimi rakentannu dekorasuunit ja pannu pysthöön valo- ja äänilaitheet. Het oon henganu ja valmistannu kostyymit illaksi ja tutustunnu paikalishiin olhoin, ette pittäät huolen niin, ette pyblikymi saapi parhaan maholisen kokemuksen esityksestä.

Met pellaama yhen päivän joka paikassa – kuusi päivää viikossa. Yhtheensä Riksteatret reisaa enämen ko 130 000 km vuuessa bussila, ja heilä oon enämen ko 8000 hotelliyötä vuuessa. Enniinthään teatterila oon viiestä kuutheen produksuunia reisula samhaan aikhaan.

Riksteatret oon etaatti Kulturdepartimentin alla. Wenche Viktorsdatter Paulsen oon  Riksteatretin nykyinen teatterinjohtaja. Hän otti yli viran 1. aprillikuuta 2025 Arne Nøstin jälkhiin. Silloin Nøst oli johtanu teatteria viisi vuotta.

MITÄ MET PELLAAMA?

Repertuaari sisältää suurista klassikkerista nykyaijan dramatikkhiin.  Riksteatret keskittyy erityisesti tekemhään teatteria lapsile ja perheile. Meän ambisuuni oon tarjota seenikynstiä, joka koethaan relevanttina, innostavana ja attraktiivisenna pyblikymile koko Norjassa. Met tehemä tivistä yhtheistyötä kulttuurihuonheitten ja muun teatteri-Norjan kans ja  presenteeraama sekä omia produksuunia, yhtheistyöproduksuunia ja hankittuja esityksiä muilta teatteriseeniltä. 

NÄYTTELIJÄT

Riksteatret oon prosektiteatteri. Meilä ei ole vakituisia näyttelijöitä, mutta engaseeraama frilanseria ja näyttelijöitä muista teatterista. Osa meän tehtävästä oon anttaa uusile talenttille maholisuus.  Siksi met usheesti järjestämmä pröövi-essintymisiä, ette löyttää aktööriä uusile esityksile.

KOE ENÄMPI

Riksteatret oon enämpi ko esitykset, jokka sie näet seenilä.  Met kuttuma kans jälkipraathiin ja työpajhoin näytelijöitten kans, introduksuunipuhetesityksheen hallissa eli toishiin lisäaktiviteethiin. Koe lissää-aktiviteetitten oon tarkoitus vahvistaa kokemusta, lisätä tuntemusta ja lua kontaktia näyttelijöitten ja pyblikymin välile. 

TARJOUS KOULUILE

Riksteatretilla oon pilettifondi josta lasten-, nuorten-, ja jatko- ja kansankorkeakoulun opettajat voivat hakea vapaapilettia. Riksteatret tarjoaa järjestettyjä suunitelmia kouluklassile valituila esityksilä. Koulusuunitelmat oon ushein soviteltu eri aiheishiin - joko esityksen valmistautumistyönä tahi syvenyksenä jälkikätheen. Met järjestämmä kans näyttelijäkohtaamisia toivheesta. Osa meän esityksistä esitethään kans päiväsaikhaan kulttuurihuonheissa - kouluklassile ilman maksutta. Lue lissää meän tarjonasta kouluile.

MITÄ NYDALENISSA TAPATTUU?

Riksteatret oon monimuotoinen toimi, joka asettaa suuria vaatimuksia logistikkale ja suunittelule. Produksuuni, administrasuuni ja pröövit oon Nydalenissa Uslussa. Sielä teatteri pittää kans pröövi-esityksiä ennen reisule lähtöä.

Riksteatretilla oon noin 70 vakituista työntekijää, jokka oon jaettu 27 eri faakiryhmhään. Lisäksi Riksteatret palkkaa noin 200 näyttelijää, ohjaajaa, teknikkarita ja muita seenikynstityötelijää vuuessa. Se tekkee meistä yhen Norjan suurimista frilanseritten työnanttajista. 

Riksteatret jakkaa työpaja Nationaltheatretin kans Brobekkissa Uslussa.

RIIKISSÄ OLEMINEN

Jos olet frilanseri tahi työtelet seenikynstin kans, tarjoamma nyt maholisuuen hakea konttoripaikkaa tahi seenilommaa aijanjaksoksi. Lue lissää RiksOppholdista.